Zahvala Branketu od obitelji

Fala ti za se, naš Anđele

Sunce se pokuzalo ozgora naše ladonji va Muleh Turinah, kako da je se normalno. Ali va hipe – s tvojen zadnjen dihon se je kambjano za nas – Turini i celi svet.

Bokon našeh dušah je s tobon šlo, a ti si mirno, tiho s gluvo va našeh rukah Isusu šo.

Branko, bi si naša veselija, naša ljubov, imeli smo sreći ca si naš, bi si provi delovac i saki don za svojo famejo škrbe. Ime si samo ljubov va srce za nas i seh okolo sebe. Ime si radi bošak, truvo, tvoje njivi, sa svojemi konjami radi si gleda va lončarice, sunce, zahod.

Pomoga si radi svojen susedan i sen ken si moga pomoć, jer tvoje ruki so se znale storit. Zno si se popruvljat, zidat i korent, vodo i pijaštreli stovljat, kosit, spruvljat, imbalivat, peljat, orat, posejat, s kompjutoron delat i još puno, puno tega.

Tvoje kobili Lila i Brauni saki don te još čekajo. Kad so videle tvojo vituro od sreći so galopale kako munjene. Uliki ke si reza i gono s njima išćo te, jer si sake zno ime. Tvoje čelice neso više sejne, treba nin tvoja pogača.

Tvoji nuki keh si ime raji od sebe neće se više veselit dok s tobon bero pičurbi i ijo repo na njive. Ki će hi na sine peljat, ki će hi ko ti kokolat. Još si hi treba navadit čuda tega. Tvoje kćeri, ki će hi ko ti čuvat. Ki će mene svojo ruko na obraze držat. Fališ nan sen,

Jer se ca gledamo vidimo tebe – našo kućo, konobico, ognjišće, konji, kozi, njivi, uliki, tvoje sliki ke si crta, tvoje pjesmi ke si piso. Tvoja vela ljubov je va našen dihe, srce i zavajk ćemo je čuvat.

Mi ćemo zute molit, a ti ćeš za nas ozgora škrbet. Fala ti za se naš Anđele. Volimo te!

Tvoji: ZDENKA, NATALIJA, LUCIA, MARIN, MARTIN, TIN, LOVRO, KRISTIJAN i FRANJO